Логото на Google од утрово „седи“ на маса на која се наоѓа роденденска торта и свеќички, опкружено со балони и поклони. Така најпопуларниот интернет пребарувач го слави својот 13-ти роденден.
Прв пат овој интернет пребарувач се појавил под името BackRub, а идејата за пребарување ја развиле тогашните студенти од Универзитетот Стенфорд во Калифорнија, Лери Пејџ и Сергеј Брин во 1997-та година. Конечниот облик Goоgle го добил во 1998-та година.
Доменот Google е регистриран на 15-ти септември, но роденденот официјално се слави на 27-ми. За име на страницата послужил математичкиот термин за број 1, зад кој следат 100 нули, а со тие сакале да го претстават волуменот на информации до кое доаѓаат корисниците. Иако последните години Google води битка со Facebook и ситуацијата не му е лесна, но мора да се признае дека светот не би бил ист без Google.