Најновото истражување на Универзитетот Тексас во Далас ќе ни овозможи наскоро да можеме да гледаме преку ѕид со помош на мобилен телефон.
Тимот од Тексас кој го предводи професорот за електроника Kent O, дошол до две значајни откритија кои би можеле да ја отворат вратата кон нова технологија.
Прво е неискористениот распон во електромагнетскиот спектар, а второто е нов вид на микрочип. Електромагнетскиот спектар се состои од бранови должини на енергија и ги мери сите фреквенции на светлината. Истражувањето на доктор О е засновано на терахерцна фреквенција која досега не беше достапна за потрошувачките уреди. Терахерцниот опсег се наоѓа помеѓу микробрановите и инфрацрвените бранови и им овозможува на уредите да „продрат“ низ објектите слично како рендгенските бранови. Кога тие сигнали со терахерцни бранови патуваат од вашиот телефон дел се враќа назад, а сензорот во чипот ги фаќа и од нив создава слика.
Чиповите ќе бидат произведени со помош на евтина CMOS технологија (Complementary Metal–Oxide–Semiconductor). Ако овие сигнали можат да создадат слика со мали леќи, што ќе биде случај со оваа технологија, тоа значи помалку пари за леќи и помала камера.
„Комбинацијата на CMOS и терахерци значи дека ќе можете да ставите чип и приемник на позадината на мобилниот телефон и да го направите во џебен уред со кој можете да гледате низ објекти“, вели др.О.
Оваа технологија би можела да се користи за многу позначајни работи од гледање преку ѕидови. На пример во медицината би можела да го замени рендгенот, а во бизнис светот да ги детектира фалсификуваните пари.
И за сите оние кои се грижат да не бидат шпионирани, научниците оваа технологија ја направија со можност да се гледа на само 10 см оддалеченост.