Универзитетот во Мериленд, САД стартуваше проект кој би можел за секогаш да го измени начинот на кој студентите се подготвуваат за испитите.
Раководството на Универзитетот, стартуваше проект со кој сака со помош на електронскиот open-source учебник да воведе бесплатни материјали за студирање. За разлика од електронските учебници кои разни издавачи ги продаваат по многу високи цени, нивните open-source верзии се во целост бесплатни и не се заштитени со авторски права.
Во изработка на учебниците, освен студентите кои “ловат“ белешки од предавањата учествуваат и професори кои исто така ги даваат своите книги и белешки кои потоа се спојуваат во бесплатен учебник.
Но, не сите професори се расположени за таков вид на соработка, што всушност е и најголемиот проблем при реализација на овој проект. Исто така, проблем претставуваат и приватните книжарници кои имаат вредни договори со универзитетите за продажба на книги и наставен материјал внатре во кругот на универзитетот и кои остро се противат на нелојалната конкуренција. Цените на учебниците пораснале помеѓу 2002 и 2012 година за повеќе од осумдесет проценти. “Овој пораст на цените е апсурден и нема никаква основа“, тврди Џеси Фокс, претседател на студентскиот одбор на Универзитетот во Мериленд. Просечно, студентот троши годишно по 1200 долари само на учебници.
“Со вакви цени, студирањето стана борба за преживување“, тврди Мени Синг, една од студентките на Универзитетот. Таа додава дека би било убаво барем еден семестар да заврши, а да не мора да се снаоѓа како најевтино да ја набавува потребната литература за предавање.