Германскиот циркус-театар Roncalli ги замени животните со 3D холографски слики кои прикажуваат слонови, коњи, па дури и риби.
Roncali циркусот кој e основан во Германија во 1976-та сега сака да го еволуира традиционалното искуство при посета на циркус на имагинативен и креативен начин - со креирање на холографски слики кои ја исполнуваат арената широка 32 метри и длабока 5 метри, овозможувајќи видливост од 360 степени за да целата публика може да ужива во спектаклот.
За да го постигнат посакуваниот ефект, агенцијата на Roncalli наречена TAG/TRAUM во соработка со компанијата Bluebox инсталирала вкупно 11 ZU850 ласерски проектори за креирање на холографското искуство. Инсталацијата била комплетирана со 11 BX-CTA03 сочива кои овозможувале проекторите да бидат позиционирани подалеку од арената, за што поголема флексибилност.
Сега, илјадници посетители можат да уживаат во ова необично циркуско искуство, со проекции на коњи кои галопираат околу арената, и слонови кои стојат на глава.
Овој концепт се гледа како еден од начините циркузите да останат релевантни, во време кога сè повеќе го губат бизнисот поради разни причини – од кои една е потенцијалот за сурово однесување кон животните.