Во екот на протестите против расизмот и полициската бруталност во САД, американскиот производител на спортска опрема „Nike“ покрена кампања под слоганот „Не прави го тоа” (Don’t do it). Тоa е, всушност, изменета верзија на она познатото „Направи го тоа“ (Just do it).
Демонстрантите ширум САД излегоа на улица по смртта на Афроамериканецот Џорџ Флојд, кој практично беше убиен при приведување во Минеаполис, Минесота, бидејќи полицаецот му ја држеше својата нога на вратот.
„Овој пат – не прави го тоа… Не преправајте се дека нема проблем во Америка. Не вртете му го грбот на расизмот. Не прифаќајте да се одземаат недолжни животи. Повеќе не наоѓајте изговори. Немојте да мислите дека вас тоа не ве засега… Ајде сите да бидеме дел од промената!“, порача компанијата „Nike“ во видеопорака поставена прво на Твитер, а потоа и на YouTube. Пораката е испишана со бели букви на црна позадина.
Во знак на солидарност, компанијата Адидас ја го сподели видеото со своја порака – „Само заедно ќе одиме напред. Заедно водиме до промени”.
Оваа кампања не е прва со која „Nike“ зачекори во областа на политичко-општествената правда во САД. Во септември 2018-та, компанијата предизвика лавина реакции објавувајќи неколку реклами со рагбистот Колин Каперник, во време кога тој беше критикуван затоа што не станал при едно изведување на американската химна, токму во знак на протест против расизмот.