Пејачот Принц е мртов на 57 годишна возраст. Веста за неговата смрт ја потврди неговиот публицист.
Безживотното тело на пејачот беше пронајдено на неговиот имот во Минесота, откако во полицијата била пријавена нечија смрт.
Минатата недела медиумите пишуваа дека ѕвездата била хоспитализирана по итно слетување со авион поради болест. Порталот TMZ напиша дека пејачот неколку недели се борел со грип.
За сега не постои официјална информација за тоа која е причината за смртта.
Принц Роџерс Нелсон, кој беше познат по своето уметничко име Принц, важеше за еден од најголемите таленти на својата генерација кој експериментираше со различни жанрови од фанк и соул, до рок и поп. Во текот на долгогодишната кариера освои седум Греми награди и имаше 30 номинации.
Зад себе ги остави големите хитови како „When Doves Cry“, „Purple Rain“, „Cream“…