Музичкиот свет остана без уште една голема ѕвезда.
Познатиот босански пејач, Кемал Монтено, ја загуби битката со болеста на одделот за интензивна нега во Клиничкиот болнички центар во Загреб и почина на 67-годишна возраст.
Како што пренесуваат хрватските медиуми, Монтено имал сепса, бил ставен на респиратор и неговата состојба била мониторирана од цел лекарски тим. Сепак и покрај многуте напори да го одржат во живот, пејачот починал во 11 часот.
Музичката легенда веќе долго време имаше здравствени проблеми. Дијабетесот му предизвика проблеми со бубрезите, по што беше приморан да направи трансплантација, а пред две години се подложи на операција на срцето.
Поради лошата состојба, медиумите веќе неколку пати досега пишуваа дека починал.
- Се смеев како луд бидејќи велат дека оној кој жив го прогласуваат за мртов ќе живее 100 години, а мене ова веќе ми е трет пат, изјави пејачот последниот пат кога започнаа да кружат гласини дека починал.
За жал овој пат информацијата е потврдена од официјалните служби на Клиничкиот центар во Загреб, а Кемал ќе замине во историјата како човекот чии хитови уште долго ќе останат запаметени.