The Revenant, најновиот филм на режисерот Алехандро Гонзалес Ињариту со 3 статуетки Златен глобус е победникот на синоќешната церемонија која се одржа во Беверли Хилтон хотелот.
Леонардо ди Каприо, актерот кој ја толкува главната улога во The Revenant освои награда во категоријата најдобар актер во драмска улога, самиот филм ја освои наградата за најдобар драма филм, а режисерот Ињариту си ја однесе дома статуетката за најдобра режија.
Во спротивната категорија, најдобар филм кој е мјузикл или комедија, The Martian триумфираше и покрај контроверзиите околу ставањето на самиот филм во категоријата (бидејќи не е ниту мјузикл ниту комедија). Мет Дејмон пак ја освои наградата за најдобар актер во мјузикл или комедија токму за The Martian.
Бри Ларсон победи во категоријата најдобра актерка за улога во драма филм, за филмот Room, додека пак Џенифер Лоренс ја освои наградата за најдобра актерка во мјузикл или комедија, за нејзината улога во Joy.
Наградите за споредни актери отидоа во рацете на Силвестер Сталоне за Creed и Кејт Винслент за Steve Jobs, додека пак филм со најдобро сценарио беше прогласен токму Steve Jobs, биографскиот филм на режисерот Дени Бојл.
Номинациите за наградите Оскар пак, ќе бидат објавени во четврток, а самата Оскаровска церемонија ќе се одржи на 28-ми февруари.
