Оваа година, македонската публика ќе добие можност да го погледне најновиот игран филм на режисерот Горан Тренчовски, Златна петорка, но сега е објавен и првиот трејлер.
Златна петорка е посветен на убиството на петте струмички студенти. Интимна драма сместена во стегите на екс режимот. Според најавите на режисерот Тренчовски не е ниту историски, ниту биографски, туку фикција на една започната љубов, пријателство...
Во филмот улогите ги толкуваат актерите Славко Штимац (Ламариниќ), Јана Стојановска / Љупка Џундева (Ката), Игор Ангелов / Петар Арсовски (Џиџи), Васил Михаил / Ненад Милосављевиќ (Алавантие), Билјана Таневски (Загариева), Дине Дрваров (Кољо), Стојан Велков(Монах); петте студенти ги играа Александар Ристевски, Влатко Илиевски, Григор Јовановски, Игор Тодоров и Виктор Јакимовски.
Филмот „Златна петорка” е во продукција на „Револушн” – Скопје, копродуценти се Македонската телевизија и Арт-попкорн од Белград. Главен помагател и партнер на филмската продукција беше Општина Струмица, која меѓу другото, пружи помош со повеќе ресурси и институции кои се во надлежност на локалната самоуправа, со давање дозволи за снимање, со асистенција и логистика на теренот.
Сценариото за овој македонски филм е работено по драмски и прозни мотиви на писателот Братислав Ташковски, а него го потпишуваат Елеонора Венинова и Билјана Гарванлиева заедно со косценаристот Тренчовски. Продуцент е Дејан Милошевски, директор на фотографија е Апостол Трпески, сценограф е Кирил Спасески, костимограф Нела Тодоровска, шминка Ирена Сенокозлиоска, тонот е на Дарко Спасовски-Пацки, а една музичка нумера во филмот изведува групата „Баклава”.
Премиерата во Струмица е закажана за 13-ти август, но не е позната датата за прикажување во Скопје и остатокот од Македонија.