IDIVIDI: Најдоброто од Бред на филмското платно

Како Анџелина, така и Бред Пит во моментов е топ тема во медиумите поради веста за разводот.

Актерот и сопругата Џоли се наоѓаат во ужасен период од приватниот живот. Караницата меѓу Пит и едно од неговите деца за кратко ги погреа гласините дека актерот бил преагресивен што резултирало со насилство. Сепак, пријателите на Бред негираат дека ситуацијата ескалирала до тој степен.

За разлика од Џоли која ги имаше „врските“ од нејзиниот славен татко Џон Војт, кога станува збор за филмските улоги, Бред Пит мораше пробивот во Холивуд да го базира на неговиот изглед.

Тој е талентиран актер, но во раните 90-ти години доби инстант слава најмногу поради краткото (но забележливо) појавување во легендарниот филм Thelma & Louise. Следната година беше дел од епската драма A River Runs Through It, а подоцна и во култните Kalifornia и True Romancе.

Во Interview with the Vampire имаше можност да го дели филмското платно со мега ѕвездата Том Круз, а во Legends of the Fall и со оскаровецот Ентони Хопкинс.

Seven во средината на 90-те ја започна соработката на Бред со режисерот Дејвид Финчер која трае до ден денешен, а истата таа година беше дел и од 12 Monkeys, филмот на Тери Гилијам кој му ја донесе првата номинација за Оскар.

Seven Years in Tibet не беше најдобро прифатен од публиката, но подобар прием имаше Meet Joe Black. Fight Club и Snatch имаат речиси култен статус кај фановите.

Spy Game го спои со уште една легенда, фантастичниот Роберт Редфорд, а Ocean's Eleven со Џорџ Клуни, колегата со кој и приватно се дружи. Потоа следеа соработките со режисери како Алехандро Гонзалес Ињариту, Квентин Тарантино, браќата Коен, Теренс Малик, Бенет Милер, Стив Меквин, Дејвид Ејер и Адам Мекеј.