Зарем има нешто што Џули Делпи не може да го направи? Џули е нескротлива сила од кога се претстави пред публиката, поточно со улогата во Mauvais Sang од 1986-та година за која беше номинирана за Cesar награда.
Во 2007-ма година таа ни го претстави само вториот долгометражен филм во кој се јавува како режисер 2 Days In Paris, но Џули покрај тоа што го режираше, го напиша сценариото, глумеше во главната улога, а беше и една од продуцентите, на оваа одлична романтична комедија.
Наслов:
2 Days In Paris
Режија/Сценарио:
Џули Делпи
Улоги:
Џули Делпи, Адам Голдберг, Даниел Брул...
Времетраење:
101 мин.
Жанр:
романтична комедија
Во 2 Days In Paris, Џули е Марион, фотограф кој ќе пристигне во Париз за да помине 2 дена во родната куќа заедно со момчето Џек (Адам Голдберг). Двајцата се исцрпени по патувањето во Венеција кое се покажало како ужасно и неромантично и мораат да поминат 2 дена со нејзините чудни родители и со еден куп чудни нови познаници кои ќе го исфрустрираат парот дополнително.
По 5 години од 2 Gays In Paris, Џули ни го претстави и следбеникот 2 Days In New York кој исто така го режираше, но со Крис Рок во главната машка улога. Интересен факт и за двата филма е што актерите кои ги портретираат родителите на Марион, се всушност вистинските родители на самата Џули Делпи.
Мала камео улога во 2 Days In Paris има шпанско-германскиот актер Даниел Брул, кој подоцна беше во актерската екипа на уште еден филм режиран од Делпи, The Countess.
Погледнете го трејлерот за 2 Days In Paris.