Дами и господа, кога Енрике Иглесијас е во вашиот град, треба да знаете неколку нешта. Прво дека можеби сте платиле карта за седење, но тешко дека тоа ќе ве задржи на своето место. Второ, дека и да не знаете да пеете, ќе пропеете и трето, кога концертот ќе заврши ќе сакате УШТЕ!
Светски познатиот музичар се потруди неговиот прв концерт во Македонија, што вчера вечер се одржа во арената „Борис Трајковски“ да остане запаметен.
Вродената латино харизма на пејачот се покажа на дело, па арената уште од самиот почеток се претвори во еден голем ноќен клуб со импресивни светлосни ефекти.
Фактот што концертот започна малку подоцна од предвиденото не и попречи на забавата што допрва следеше. Енрике ја отвори вечерта со „I’m a Freak“, сосема доволна провокација за публиката да влезе во денс расположение и тотално да откачи со него. По ова ред се редеа „I Like How It Feels“, „Heartbeat“,„Ring My Bells“...Меѓу песните кои Иглесијас ги изведе пред присутните се најде и безвременската „Knockin’ On Heaven’s Door“.
Првата кулминација се случи кога пејачот реши малку подобро да се запознае со својата публика. Музичките ѕвезди од светски ранг се опколени со куп телохранители кога се симнуваат од сцената, но тоа не е случајот и со оваа латино ѕвезда.
Енрике направи сè за да се почувствува како дома, дури и кога тоа значеше да се искачува по столчињата во салата за да би можел да ги прегне обожавателите и да се фотографира со нив.
Не му пречеше што сите посакуваа да го допрат, ниту пак што врескаа на сиот глас понесени од еуфоријата. На дел од нив им дозволи и да пеат наместо него. Постојано трчаше од еден на друг крај од сцената и воодушевен од фактот што публиката добро го знае секој стих од неговите хитови, рече дека ќе се пресели во Скопје.
Шоуто траеше само час и половина. За светот сосема пристојно, но за нас, кои сме навикнати на целовечерни спектакли изгледаше прекратко.
Ах, Енрике....Сакаме уште!!!!
Н. Вуковиќ