Познатата хрватска пејачка Габи Новак почина на 89-годишна возраст.
Откако на 17 август 2015 година го загуби сопругот Арсен Дедиќ, кантавтор и композитор со кого помина повеќе од четири децении во брак, Габи Новак на почетокот на јуни оваа година се соочи со уште една тешка лична трагедија – смртта на нивниот син Матија Дедиќ, еден од најистакнатите хрватски џез пијанисти, кој почина на 8 јуни во Загреб, на 52-годишна возраст.
Габи Новак е родена на 8 јули 1936 година во Берлин. Детството го поминала во Берлин, а потоа на Хвар, по што се преселила во Загреб. Таму ја завршила Школата за применета уметност.
Кон крајот на 1950-тите почнала да настапува, а нејзиниот препознатлив глас брзо ја направил една од најомилените пејачки на тогашната југословенска музичка сцена. Нејзиниот репертоар опфаќал поп и џез, а уште за време на 1960-тите стекнала голема популарност и признанија од критиката.
За време на богатата кариера снимила низа албуми и синглови и соработувала со врвни композитори и музичари.
Нејзините уметнички достигнувања се потврдени со бројни награди, вклучувајќи повеќе „Порин“ – во 2002 година за најдобра џез изведба, во 2003 година за албум на годината, најдобар женски вокал, најдобар поп-албум и најдобра вокална соработка, а во 2006 година го добила и „Порин“ за животно дело.