Британската телевизиска комапнија ITV , јавно и се извини на првата дама на британската поп музика Адел, за
инцидентот што се случи доцна синоќа за време на церемонијата при доделувањето на годинешниве музички награди Brit Awards, јави дописникот на МИА од Лондон.
Со извинување се огласи и организаторот на оваа традиционална и манифестација, која е британска верзија на светски познатата церемонија за доделување на музички награди Grammy, на која Адел триумфираше, како првата британска пејачка што освои дури шест награди.
Синоќешниот инцидент се случи во моментот кога Адел, примајќи ја наградата за албум на годината, почна да се заблагодарува. Неуспевајќи да го заврши тоа што сакаше да го каже, таа беше грубо прекината, среде зборување, од водителот познатиот британски комичар и забавувач Џејмс Корден. Неговата неочекувана постапка предизвика бучно негодување од дел од публиката во салата, а навредената Адел му покажа „среден прст“ на водителот и си замина од сцената.
Претходно таа рече дека „ништо не ја прави погорда од тоа да дојде дома (во Велика Британија) со шест Grammy награди, а тука да ја освои и Brit Award. Горда сум што сум Британка и што го развевам нашето знаме, рече Адел, но беше прекината од водителот.
Во извинувањето на ITV се вели дека жалат за инцидентот, но постапката на водителот ја објаснуваат со времето предвидено за телевизискиот пренос, што и онака велат дека било пречекорено. Адел и самата подоцна изрази жалење за својот гест „со прстот“, но рече дека тоа им било упатено на водителот и на организаторите, а не на публиката и на нејзините симпатизери.