Грција и Кипар во парламентите ќе поднесат закони за гарантирање на влоговите до 100.000 евра

Атина, 9 октомври (МИА) - Грција и Кипар во парламентите ќе поднесат предлог закони за заштита на влоговите на своите граѓани, а најмалиот гарантиран износ на депозитите ќе биде до 100.000 евра, соопштија електронските медиуми во Атина и Никозија.

Грчкиот министер за економија и финансии Георгиос Алогоскуфис изјави дека гаранцијата на влоговите е валидна за сите банки во земјата.

Гувернерот на грчката Централна банка Јоргос Провопулос уште еднаш ги увери Грците дека не треба да се плашат за своите влогови, бидејќи банкарскиот систем во земјата е
сигурен и финансиски оддржлив.

Банките во Кипар се стабилни, а од нив доделените станбени кредити се безбедни, изјави кипарскиот министер за финансии Харилаос Ставракис, кој појасни дека Владата во
Никозија одлучи да поднесе предлог закон за заштита на влоговите на граѓаните заради заканите предизвикани од светската финансиска криза.