Раководството на Реал Мадрид веќе донело одлука да се раздели со холандскиот репрезентативец Рафаел ван дер Варт и тоа, најверојатно, ќе се случи по завршувањето на оваа сезона, тврди шпанскиот дневен спортски весник АС. Поранешниот фудбалер на Ајакс и Хамбургер дојде на Сантијаго Бернабе претходново лето, но не успеа да се наметне како лидер на тимот иако беше доведен како звучно засилување, единствено од таков ранг во летниот преоден рок.
Ван дер Варт играше како стартет само неколкупати на почетокот од шпанското првенство и постигна четири гола, еден против Нумансија во победа од 1:0 и хет-трик со Хихон кога "Кралскиот клуб" славеше со 7:1. Подоцна с$ почесто остануваше на клупата за резервни играчи, а и кај него се забележува апатијата и нерасположението кога ќе излезе на теренот.
Најголемата причина за разделбата на Реал и Ван дер Варт, како што вели АС, е новиот тренер на шпанскиот првак Хуанде Рамос, кој и порачал на управата на клубот дека не му е потребен фудбалер од таков калибар. Потврда за тоа беше и неговата последна одлука на дербито против Барселона, по повредата на Весли Снајдер во 35. минута да не го стави во игра Ван дер Варт, туку анонимниот Паланка, кој не е познат дури и за навивачите на Реал Мадрид. АС во продолжение додава дека се многу мали шансите Холанѓанецот да го разувери раководството во врска со оваа одлука, а останува неизвесно каде тој би ја продолжил кариерата идната сезона.