Горан Пандев летово се враќа во Интер и нема да биде откупен неговиот договор со Наполи. Оваа информација ја објавуваат медиумите од Италија, кои коментираат дека "наполитанците" не можат да му го гарантираат првотимскиот статус на Пандев дури и по цена ако летово од клубот си заминал Лавеци и Кавани. Горан Пандев, според договорот, има обврски кон Интер до 2015 година. Тој летово ќе се врати во составот од Милано и од таму ќе чека понуда за нова отстапница или за откупување на договорот. Ако во Интер одлучат дека Пандев не им е потребен постојат шанси нашиот репрезентативец да замине во Фиорентина, а доколку плановите се тој да ја напушти Италија тогаш во преден план се Севиља од Шпанија, но и клуб од Турција, кој има сериозни намери да го добие потписот на фудбалерот од Македонија.
Горан Пандев во август беше отстапен од Интер на Наполи за кој до овој момент одигра 20 натпревари, а постигна 6 голови. Сепак, сите овие најави не се комплетно чисти со оглед на тоа дека во неделите кои следат ќе се решаваат многу судбини. Ако Наполи сака да го откупи Пандев од Интер ќе треба да плати сума од околу 8.000.000 евра за неговата слобода. Интер пред три години за безпари го доби нашиот фудбалер кој како слободен играч си замина од Лацио по судски спор поради мобинг.