Вестите дека спортскиот директор на Барселона, Ангело Брајда, бил во Торино по играч на Борусија Дортмунд се покажаа неточни, а вистината е дека тој го следел мечот и имал разговори за ангажман на талентираниот играч од Франција, Пол Погба.
Веќе е јасно дека Французинот ќе го напушти Јувентус на крајот од оваа сезона, а на долгиот список се приклучија и Каталонците кои би го откупиле договорот на Погба, но и би го оставиле да игра за Јуве до крајот на забраната. Тоа би значело дека Погба би пристигнал на „Ноу Камп“ следниот јануари.
Според пишувањата на италијанските медиуми, сумата која Барса е подготвена да ја плати изнесува 90 милиони евра. Со оглед на тоа што Јуве не сака да го продаде за помалку од 100 милиони ова би можело да биде проблем, но дефинитивно ќе има преговори, во кои би можело да има одредени клаузули што би придонеле за да дојде до реализација на трансферот.
ПОЛ НЕ САКА ВО ЈУНАЈТЕД
Добро е познато дека клубот каде што Погба беше забележан е Манчестер Јунајтед, но тој не заигра во оваа екипа. Таму не доби вистинска шанса, па Јувентус му овозможи да го развие својот талент.
Токму поради тоа Погба вели дека нема намера никогаш да се врати во редовите на Манчестер Јунајтед и дека кариерата ќе ја продолжи во друга екипа. Доколку одлучи да се пресели во Англија опција се тимовите на Челзи и Манчестер Сити. Постои можност за преселба во Франција, а оттаму е посакуван од ПСЖ. Од Шпанија покрај од Барселона заинтересираност има и од Реал Мадрид.