На ден пред почетокот на јубилејниот дваесетти кошаркарски шампионат во самостојна Македонија, екипата на Овче Поле од Свети Николе се откажа од настап и екипите што по распоредот требаше да играат со него ќе бидат слободни.
По откажувањето на светиниколци, Капитал Банка Прва Лига во сезоната 2011/12 ќе брои девет клубови.
Новото првенството ќе почне со натпреварот Работнички - Вардар утревечер (18 часот) во „Градски парк“ во Скопје. Половина час подоцна во Струмица ќе играат АБА Струмица и Торус, а од 19 часот во Кавадарци ќе играат Фени Индустри и Кожув.
Утре со натпреварот од 17 часот во „Јане Сандански“ меѓу домашниот МЗТ Скопје и Лирија ќе биде комплетирано 1.коло во кое слободно е Куманово.
Денеска во 17 часот истекува рокот за подмирување на долговите и котизацијата на клубовите кон Здружението на прволигашите. Доколку некој од клубовите должници не ги подмири долговите до истекот на рокот, според договорот на Втората седница на Здружението, тој ќе биде суспендиран се додека не ги регулира сметките.
Во досегашните 19 првенства најуспешен тим е Работнички со 14 освоени титули, пред бранителот на шампионскиот трофеј од последните две сезони Фени Индустри кој има три титули, а по еднаш шампиони биле Струмица и Николферт од Гостивар.