Поради удирање на противнички играч, фрлање шише кон играчите од гостинската клупа и повторување на делото „неспортско однесување“, кошаркарот на Работнички Иван Саздов е казнет со забрана на играње во траење од една година.
Toa е одлуката на Комисијата за натпреварување при Македонската кошаркарска федерација по инцидентот на четвртиот натпревар од плеј офот меѓу Работнички и МЗТ Скопје одигран во неделата во салата „Градски парк“.
Парична казна од 32 илјади денари заработи и клубот Работнички поради организациски пропусти на натпреварот, голем број фрлени предмети на теренот од страна на неговите навивачи, како и неспортско и навредливо навивање.
МЗТ Скопје помина со парична казна од шест илјади денари поради националистичко и неспортско навивање на неговите навивачи.
Следниот натпревар кој воедно ќе биде решавачки за тоа која екипа ќе игра во финалето е закажан за в четврток во салата „Јане Сандански“ со почеток од 20 часот.