Ракометарите на Вардар Про утре со почеток во 18 часот во „СРЦ Кале“ во Скопје го играат првиот натпревар од 2. коло од ЕХФ против тимот на Извиѓач од Босна и Херцеговина. „Црвено-црните“ со оптимизам го очекуваат утрешниот дуел против квалитетниот противник.
- Ние нема да бркаме разлика иако знаеме дека е потребна победа. Во моментов триумф ни е неопходен за да ја вратиме победничката атмосфера во тимот. Мислам дека оваа победа ќе биде добредојдена и за следните натпревари во Регионалната лига кои не очекуваат, истакна тренерот на вардарците Веселин Вујовиќ на денешната средба со новинарите.
Вујовиќ упати пофални зборови за гостите од Босна и Херцеговина.
- Извиѓач е квалитетна екипа. Пред неколку сезони беше една од водечките во својата земја, а од нејзините редови потекнаа играчи од европски калибар како Денис Бунтиќ и Мирко Алиловиќ репрезентативци на Хрватска и Мирсад Терзиќ репрезентативец на Босна и Херцеговина. Ќе ни биде тешко, но верувам во конечен успех, рече тренерот на Вардар.