Лоши вести за Металург и за македонската ракометна репрезентација по добиените резултати за повредата на Филип Миркуловски. На вчерашниот натпревар против Шпанија, Миркуловски ја обнови старата повреда поради која паузираше две недели во тимот на Металург и сигурно е дека нема да игра на реваншот в недела во Гвадалхара.
- Пукнат ми е адукторот на левата нога. Се работи за стара повреда, која сега ја обновив. Во моментот чувствувам силна болка. Ме очекува пауза во траење од две до три недели. Повредата дојде во многу непријатен момент, пред важни натпревари на нашата репрезентација и на мојот клуб, Металург. Најверојатно не ќе бидам во состојба да патувам во Шпанија, за што навистина жалам, изјави Миркуловски за веб-страната на Металург.
Освен Миркуловски на вчерашниот дуел во македонскиот состав на повреди се пожалија и капитенот Кирил Лазаров, Велко Маркоски и Владо Недановски, но за тежината на повредите на овие играчи се уште нема информации.