Македонскиот вицешампион Металург утре ќе го одигра првиот натпревар од квалификациите за пласман во групите од Лигата на шампионите. Ривал на Металург е унгарската екипа ПИК Сегед.
- Станува збор за сериозен противник, кој неколку сезони по ред игра во групите од Лигата на шампионите. Мораме позитивно да мислиме и секој ривал мора да се победи. Но, мораме тактички дисциплинирано да играме и да не влеземе во нивниот ритам на игра. Станува збор за квалитетен состав, кој дополнително се засили со неколку нови играчи. Во нивната екипа има неколку репрезентативци на Унгарија, но и на други репрезентации, изјави тренерот на Металург, Лино Червар на прес конференцијата.
Червар е задоволен од формата на играчите и очекува засилувањата пред се Роберт Атман да внесат свежина во играта на тимот од Автокоманда.
Новиот капитен на Металург, Наумче Мојсовски изјави дека ПИК Сегед е добар тим. - Ние мора да ја играме нашата игра и на двата натпревара да се бориме за секој гол како во нападот и така во одбраната заедно со голманите да го браниме нашиот гол, рече тој.
Дуелот Металург – ПИК Сегед се игра во СЦ „Борис Трајковски“, утре среда на 28.август со почеток во 19:00 часот.