Што да се подари на младенци кои имаат се? Во случајот со принцот Вилијам и Кејт Мидлтон одговорот е дајте донација.
Новото време бара поинакви манири, па и поинакви подароци.
Принцот Вилијам и неговата избраничка не фантазираат за соба исполнета со скапоцени подароци. На нив не им треба кревет од јаворово дрво како оној што го добија на подарок родителите на Вилијам, принцезата Дајана и принцот Чарлс, кога се венчаа во 1981 година.
Не им треба ниту сервис од 20 сребрени чинии со изгравиран датум на венчавката, подарок од Австралија за истата прилика.
Младата кралска двојка ги замоли сите кои сакаат нешто да им подарат тоа да го направат по пат на донации во фондот, со кој се финансираат 26 хуманитарни и други организации.
Повеќето од овие организации се наоѓаат на територија на Велика Британија, но има организации кои се во земјите на Комонвелтот, како што е групата за помош на настраданите во земјотресот во новозеландскиот град Крајстчерч, Канадската крајбрежна стража и Австралиската мобилна докторска служба.
Некои организации кои ќе добијат пари од „свадбените“ донации упатуваат на војничката кариера на Вилијам. Имено, неколку од нив даваат финансиска помош на британски војници и нивните семејства, како Здружението на вдовици на воени лица.
На принцот Вилијам исто така посебно му се важни хуманитарните акции во Африка, што може да се види од фактот дека сака да помогне на проектите на Лондонското зоолошко здружение во спасување на црниот носорог и африканскиот слон од изумирање.
Кралската двојка се одлучи да пружи поддршка и на децата преку хуманитарна организација која работи со младите во создавање на опкружување без насилства и злоупотреби.
Парите од донациите ќе се дистрибуираат низ фондација која заедно ја основаа Вилијам и неговиот помлад брат Хари.
Сепак, Вилијам и Кејт ќе добијат и неколку вистински подароци. Од жителите на Велс, каде ги поминале последните две години поради ангажманот на Вилијам како пилот на РАФ, ќе добијат специјално дизајниран велшки кристал.
Една јужноафриканска нискобуџетна авионска компанија, во духот на африканскиот свадбен обичај „лобола“, се одлучи на семејството на Кејт Мидлтон да подари стадо крави. Компанијата Кулула соопшти дека кравите ќе ги купи во Велика Британија и ќе ги испорача на кралската двојка, под услов родителите на Кејт да го прифатат тој подарок.
Канадската Влада, која е позната по скапоцени свадбени подароци за членовите на британското кралско семејство, ќе го обелодени својот подарок на денот на венчавањето.
Меѓутоа, веќе е познато дека канадската провинција Алберта подарила 25.000 канадски долари (18.000 евра) за седум стационари за млади бездомници.