Очите на целиот свет денеска се вперени во Лондон, каде британскиот принц Вилијам и неговата избраничка Кејт Мидлтон го кажаа судбинското „да“.
Ѕвоната на Вестимистерската опатија со тричасовно ѕвонење ја означуваат женидбата на принцот Вилијам, втора по ред за британскиот кралски престол.
Илјадници луѓе се собраа денеска на патот од Бакингемската палата до Вестминистерската опатија за да можат барем за миг да ги видат принцот Вилијам и Кејт Мидлтон и на некој начин да учествуваат на венчавката, која би требало да ја заживее британската монархија.
Една третина од жителите на планетата го гледаат заветувањето на вечната љубов и на заеднички живот на Вилијам и Кејт.
Околу 1.900 совршено облечени гости, меѓу кои и членовите на кралските семејства од целиот свет, поп ѕвезди, спортисти и државници пристигнуваа во опатија.
Британската Влада го прогласи денешниот ден за национален празник, на што најмногу се израдуваа учениците и туристичките работници, кои очекуваат стотици илјади посетители во текот на викендот.
Во меѓувреме, принцот Вилијам и Кејт Мидлтон добија титули на војвода и војвоткиња од Кембриџ, соопшти денеска Бакингемската палата.
Титулата на Вилијам е една од трите која му ја додели баба му, кралица Елизабета Втора по повод неговата венчавка со Кејт Мидлтон денеска попладне во Вестминистерската опатија.
Вилијам исто така ќе биде и ерл од Стратерн и барон Карикфергус, додека Мидлтон ќе биде грофица од Статер и бароница од Карикфергус.
Портпаролот на Вилијам рече дека принцот е „почестен“ со титулата.
Традиционално во Велика Британија, кралските младоженци на денот на венчавката добиваат барем една титула која по автоматизам им следува на младите.
Освен тоа што ќе биде војвоткиња, Кејт Мидлтон технички ќе биде и принцезата на Вилијам од Велс, но не и официјално принцеза Кетрин, затоа што е родена во граѓанско семејство.