Може да се комбинира со скара, со лепче и сирење, а одличен е и како додаток со секое јадење и мезење.
Домашниот ајвар е омилена зимница во секој дом, па овој проверен рецепт сигурно ќе ве израдува. Постапката на подготовка е едноставна, а потребно е само внимателно да ги следите упатствата.
Потребни состојки:
- 10 кг. црвени пиперки
- 3 големи домати
- 5 дцл. масло
- сол во вкус
- 1 голема лажица шеќер
Подготовка:
На печка доколку ајварот го правите надвор, или во рерна или рингла испечете ги пиперките, па излупете ја лушпата и исчистете ги од семки. Изладете ги пиперките ставете ги во цедило да се исцедат, па продолжете со работа за час или два.
Потоа испечете ги и доматите, излупете ги и исцедете. Исцедените пиперки и домати сомелете ги на апарат за мелење месо, па добиената смеса преместете ја во голем лонец и лесно започнете да ги варите.
Смесата мешајте ја што повеќе, а постапно при варењето додавајте масло, по 1 дцл. на секои 20 минути. Имајте на ум дека маслото не смее да избие на површина. При самиот крај, дваесетина минути пред крајот на варењето додадете сол и шеќер. За да знаете дека ајварот е готов, со голема лажица поминете на дното, доколку таа со себе остава трага со која можете да го видите дното на тенџерето, тогаш знаете дека ајварот е готово. Теглите подгответе ги додека ајварот се вари. Загрејте ги во печка на 50-на степени, а наполнете ги со ајварот откако ќе го тргнете од оган.
Кога ќе ги наполните, на врвот на секоја тегла долијте малку масло и добро затворете ги со капаче. Држете ги на мрачно место, прекриени со крпа.
Пријатен апетит.