Трендовите во врска со храната постојано се менуваат, но авокадото е постојано присутно скоро во секој од нив, благодарејќи на неговиот состав кој изобилува со хранливи состојки.
Авокадото е едно од ретките овошја кои содржат здрави, мононезаситени масти, кои се исклучително важни за одржување на ситоста, бидејќи организмот ги обработува многу подолго отколку протеините и јаглехидратите.
Овие масти помагаат за намалување на холестеролот и редуцирање на ризикот од срцеви заболувања, а некои истражувања покажуваат дека може позитивно да влијаат на нивото на инсулин, со што се намалува ризикот од тип 2 дијабетес.
Покрај мононезаситените масти, авокадото е полно и со:
Витамин К: влијае врз нормално згрутчување на крвта и служи како превенција против ослабување на цврстината на коските
Витамин Ц: влијае на растењето и заздравувањето на клетките – почнувајќи од оние на кожата, па до нервите. Исто така е и антиоксиданс, што значи дека го заштитува телото од оштетување од слободните радикали кои предизвикуваат канцер и разни срцеви заболувања.
Витамин Б6: овозможува здрава функција на имунолошкиот систем, нервите, и формирање на црвени крвни зрнца.
Витамин E: му помага на телото во создавањето на црвените крвни зрнца и го подобрува имунинетот, а исто така е и есенцијален антиоксиданс за здравјето на кожата и косата.
Фолати: го одржуваат здравиот развој на клетките и ткивата, служат како превенција од еден тип на анемија, и се основни за правилен развиток на мозокот и рбеток кај фетусите – така што е исклучително важно трудниците да земаат ваков суплемент.
Магнезиум: важен е за правилна функција на мускулите и нервите, го подобрува имунитетот, цврстината на коските, го регулира шеќерот во крвта и помага при создавањето на енергија за организмот.
Калиум: помага во одржување на нормалниот баланс на течностите во телото, помага и на функцијата на нервите и мускулите, на синтезата на протеините (за создавање нови мускули), и е одличен за намалување на подуеноста.
Растителни влакна: помагаат за одржување на здравјето на дигестивниот систем и цревата, го намалуваат холестеролот, го стабилизираат шеќерот во крвта и помагаат за одржување на телесната тежина
Лутеин: овој каротеноид – име за мноштвото растителни пигменти кои произведуваат црвена, портокалова и жолта боја – е одличен за здравјето на очите, бидејќи заштитува од очни болести, делумно поради апсорбирањето на сината светлина која што е штетна. Лутеинот е исто така и антиоксидант.