Има ли некој што не јаде пица? Било да е обична маргарита или пак нешто покомплицирано, пицата е едно од омилените јадења на денешницата. Сепак, некои комбинации на состојки кои што се користат низ светот звучат мошне откачено.
1) Банана и кари – Шведска
Банана-кари пицата се наоѓа во секцијата за “обични“ или “класични“ пици во менијата во Шведска и е многу слична на Хавајската која што има и шунка, но не и кари.
2) Пушено месо од ирвас – Финска
Наречена пица Берлускони, според италијанскиот лидер кој во 2005-та ги навредил Финците во врска со нивните обичаи за храна и за јадењето месо од ирвас, нејзините главни состојки се токму тој тип на пушено месо, специјален вид на печурки, и кромид.
3) Сардини, туна, скуша и лосос – Русија
Заборавете на Кватро Формаџи пицата со 4 врсти сирења. „Москва“ е пица од Русија која има 4 врсти на риби: сардини, туна, скуша и лосос, гарнирани со разни билки и кромид, а се служи оладена.
4) Кокос – Костарика
Додека скоро насекаде низ светот кокосот се додава во слатката храна, во Коста Рика тоа е еден од омилените додатоци за пица, заедно со ракчиња.
5) Крокодил и кенгур – Австралија
Овие животни се исклучително застапени во Австралија, па има голема смисла да се вклучени и во менито на пицериите. Таму оваа пица често се служи маринирана со тајландски билки и зачинет кокосов крем, а се нуди и пица со месо од ему.
6) Мастило од лигњи – Јапонија
Јапонија е позната по морската храна, а особено лигњите, чие мастило се користи и како додаток врз пица. Иако визуелно не изгледа баш привлечно, мастилото и дава слаткаст вкус, а обично се комбинира со ракчиња или октопод.
7) Грашок – Бразил
Бразилските пици имаат (за нас) невообичаени додатоци како моркови или суво грозје, а еден од честите е и свежиот грашок.