Кој не сака да јаде бурек? Сите сакаме! Добро, освен оние кои се на диета или водат здрав живот. Но, бидејќи во последно време постојано пишуваме некои посни рецепти, време е да ви предложиме да направите нешто масно, а помасно од домашен бурек.. не постои.
Потребни состојки:
- 500гр тенки кори (од тие за пити)
- 250-300гр мелено месо
- 2 главици кромид
- масло
- сол и црн бибер
- 250мл млака вода
- 50мл масло
- лажичка сол
Начин на подготовка:
Во поголема тава на малку масло, испржете го ситно исечканиот кромид. Кога малку ќе омекне, додадете му го месото и мешајте 15-на минути. Додадете му сол и црн бибер. Во лонче со топла вода додадете масло и сол и мешајте.
Садот за печење намачкајте го со масло и ставете на дното 3-4 кори, чии краеви ќе излегуваат надвор (види фото), а секоја кора попрскувајте ја со водата и маслото. Останатите кори исечкајте ги на помали, делови.
Ставете еден ред исечкани кори, попрскајте ги со водата, а потоа ставете месо. Така редете го садот се додека не се истроши целото месо, а за на крај оставете 2-3 лажици вода. Може ви изгледа дека има премногу вода, но таа количина е потребна за корите да не останат суви.
Последниот слој на месо, затворете го со оние кори кои останале надвор од садот, попрскајте ги со останатата вода и ставете го бурекот во загреана рерна. Печете околу 30-40 минути на 180°С, додека не зацрвенее.
Кога ќе се испече, извадете го од рерна, а преку садот поставете една чинија па превртете го на тој начин што дното ќе остане горе во чинијата. По 10 минути исечете го.
