Dave’s Kitchen: Есенска пита со јаболка

Есента е веќе пристигната и нема ништо поубаво од тоа да се ужива со добро подготвен колач од јаболка.

Давор од Dave’s Kitchen го има совршениот рецепт за колач со јаболка кој со сигурност ќе биде одличен со шолја чај или кафе.

Потребни состојки:

• 15 лажици брашно
• 15 лажици шеќер
• 3 јајца
• 15 лажици масло за јадење
• 1 лажичка екстракт од ванила
• 15 лажици млеко
• 1 пакетче прашок за печиво
• Прстофат сол
• Сок од 1 лимон
• 800 гр. излупени и изрендани јаболка
• 100 гр. суво грозје
• 100 гр. сечкани ореви
• 2 лажички цимет

Начин на подготовка:

Најпрво во длабок сад со жица за матење измешајте ги заедно јајцата со шеќерот. Додадете го екстрактот од ванила, маслото и млекото. Добро промешајте и додадете ги брашното, солта и прашокот за печиво заедно измешани. Промешајте додека не добиете убава смеса за колач.

Премачкајте го калапот во кој ќе го печете колачот со масло за јадење и набрашнете ја површината. Истурете половина од смесата и испечете ја на загреана рерна од 180 степени околу 15 минути. За тоа време промешајте ги ренданите јаболка со сокот од лимон, сувото грозје, циметот и исечканите ореви. Филот со јаболка, ставете го врз испечениот пандишпан и врз филот додадете го преостанатиот дел од смесата за колачот. Печете на 180 степени околу 15-тина минути или додека колачот не добие убава златно-кафена боја.

Повеќе рецепти од Давор, можете да најдете на неговата официјална ФБ страница Dave’s Kitchen и неговиот Инстаграм профил.