Нема ништо подобро од тоа да се започне утрото со вкусен меден колач од брусница и јаткасти плодови.
Овој четврток Давор од Dave's Kitchen го има совршениот рецепт за тоа како утрото да ви започне во полн сјај.
Потребни состојки:
- 420 гр. брашно
- 2 лажички сода бикарбона
- 1 лажичка сол
- 130 гр. шеќер
- ¼ лажичка мелено каранфилче
- 5 јајца
- сок и кора од 1 портокал
- 180 мл. масло за јадење
- 240 мл. млеко
- 1 лажица екстракт од ванила
- 150 гр. сува брусница
- 100 гр. сечкани бадеми
Начин на подготовка:
Во длабок сад најпрво промешајте ги заедно сувите состојки: брашното, содата, солта, шеќерот и меленото каранфилче. Во друг длабок сад промешајте ги заедно влажните состојки: јајцата, сокот и кората од портокал, маслото за јадење, млекото и екстрактот од ванила.
Во садот со сувите состојки додадете ги влажните и промешајте со жица за матење. Внимавајте да не ја измешате смесата премногу. Додадете ја сувата брусница и исечканите бадеми.
Смесата префрлете ја во два калапи за векни, кои претходно ќе ги премачкате со путер. Печете на загреана рерна од 180 степени околу 45-50 минути или додека не добие убава златно кафена боја.
Давор ви посакува добар апетит и забавно готвење!