Оваа недела Давор од Dave`s Kitchen со вас и нас споделува неколку практични совети за готвење на месо.
Месото е често застапено во македонската традиционална кујна а и во помодерното готвење, па не е лошо совет, два да ви се најдат доколку имате проблем при готвењето со оваа намирница.
1. Загрејте ја тавата добро за да го истакнете вкусот на месото
Пред да започнете со пржење на месото, бидете сигурни дека тавата е добро загреана и маслото во неа исто така. Ставете го парчето месо да се запржи на врелото масло, на тој начин ќе се создаде цврста крцкава кора која во себе содржи многу вкусови. Оставете го две до три минути (во зависност од дебелината), па потоа превртете го и од другата страна.
За да бидете сигурни дека месото ќе добие рамномерно златно кафена боја пред да го ставите во тавата треба да е комплетно суво. Поминете го со кујнска хартија пред да го готвите, особено замрзнатото месо кое се одмрзнало. Користете путер за да го извлечете максималниот вкус.
2. Користете разни зачини за да го збогатите вкусот
За да добиете дополнителен, по малку и медитерански вкус на јадењето додадете изгмечен лук, гранчиња мајчина душичка, рузмарин или пак оригано во месото кое го приготвувате. Доколку подготвувате маринада претходно, ставете ги овие билки во самата маринада, па на тој начин ќе добиете подобар вкус.
3. Месото нека „одмори“ по готвењето
Кога ќе го зготвите месото, без разлика дали ќе го пржите или печете, веднаш штом биде готово покријте го со алуминиумска фолија за да можете да извлечете многу подобар вкус. На овој начин пареата од месото не оди никаде туку се враќа во самото месо, го збогатува вкусот и добива поголема сочност. Течностите ќе се задржат во месото и ќе имате чинија полна вкусови.
Пронајдете вкусни рецепти од кујната на Давор на неговата официјална ФБ страница Dave`s Kitchen.