Давор од Dave`s Kitchen споделува еден лесен и брз рецепт за вкусен куглоф кој се подготвува само за 5-10 минути не сметајќи го времето за печење.
Одличен за овој период од годината исполнет со топли зачини како цимет, мускатно оревче, а сушените јаболка даваат одличен финиш на целиот рецепт.
Потребни состојки:
- 240 гр. брашно
- 2 лажички прашок за печиво
- 1 лажичка сол
- 1 1/2 лажичка цимет
- 1 1/2 лажичка сув ѓумбир во прав
- 1/2 лажичка мускатно оревче
- кора од 1 портокал
- 250 гр. светло кафен шеќер
- 180 мл. масло за јадење
- 50 мл. мед
- 4 јајца
- 120 гр. џем од јаболка или кајсија
- 1 лажичка екстракт од ванила
- 120 мл. вода
Начин на подготовка:
Во длабок сад промешајте ги брашното, прашокот за печиво, солта, циметот, ѓумбирот, мускатното оревче и кората од портокал.
Во друг длабок сад со помош на жица за матење промешајте ги заедно шеќерот, маслото за јадење, медот, јајцата, џемот, ванилата и водата. Во садот со влажните состојки додадете ги сувите состојки и промешајте додека не добиете убава хомогена смеса.
Вака подготвената смеса претурете ја во претходно премачкан со масло и набрашнет куглоф и печете на загреана рерна од 170 степени околу 35-40 минути.
Декорирајте со суви парчиња јаболки кои ќе ги подготвите на тој начин што во загреана рерна од 80 степени ќе ги сушите околу 1 час од едната страна, па 1 час од другата страна.
Повеќе идеи за тоа што вкусно да подготвите во кујната погледнете на официјалната ФБ страна на Давор, Dave`s Kitchen.