Есента веќе пристигна, а на нас ни преостанува да и кажеме добредојде со оваа превкусна супа од домати.
Одличен начин како да се загреете во текот на студените денови кои доаѓаат. Оваа супа од домати е посна, одлична за вегани и вегетаријанци.
Еве како да ја подготвите.
Потребни состојки:
- 4 домати јабучари
- 3 пиперки ајварки
- 3 чешниња лук
- 2 мали главици кромид
- Сол и мелен црн пипер
- Маслиново масло
- 500 мл. вода
- 1 посна коцка за супа
Начин на подготовка:
Во тавче за печење најпрво ставете ги доматите исечени на половина, чешнињата лук и пиперките исечени на парчиња да се испечат околу 30 минути на 200 степени, загреана рерна.
Во тенџере на оган ставете малку маслиново масло и запржете го кромидот исечкан на покрупни парчиња. Откако ќе се испечат доматите, пиперките и лукот додадете ги во тенџерете со запржениот кромид. Додадете ја водата и коцката посна супа. Посолете по вкус и додадете мелен црн пипер по вкус. Оставете течноста да дојде до точка на вриење и тогаш префрлете ја во блендер целата смеса или ако имате помал блендер, блендирајте на два три пати. Изблендираната супа вратете ја во тенџере и оставете да се крчка околу 10 минути.
Сервирајте со неколку капки маслиново масло, свеж босилек и две стапчиња грисини.
За повеќе рецепти посетете ја официјалната ФБ страна на Давор, Dave’s Kitchen.