Ѓумбирот има значителни здравствени придобивки, без разлика дали е свеж, рендан или во прав.
Кога купувате свеж ѓумбир, гледајте коренот да е цврст и влажен и да е потежок отколку што изгледа.
Свежиот ѓумбир може да се чува на отворено неколку дена, а за да трае подолго потребно е да се завитка во хартиени салфетки и во пластика пред да се стави во фрижидер. Исто така може и да се замрзне (цврсто завиткан во пластична кеса), а доколку се решите за тоа пожелно е претходно да се излупи или измеле (за полесно складирање).
И покрај тоа што може да се најде преку текот на целата година во повеќето супермаркети, свежиот млад ѓумбир најчесто го има на пролет и нема толку силен вкус како оној постариот од супермаркетите. Ваквиот млад ѓумбир има помалку влакнеста структура и скоро воопшто нема лушпа, па нема ни потреба да се лупи.
Се препорачува свежиот ѓумбир да се лупи пред да се користи за готвење, бидејќи лушпата организмот тешко ја вари.
Здравствените придобивки од ѓумбирот се стимулирање на варењето, редуцирање на гадењето и инфламацијата, како и позитивното влијание на нивото на холестерол.
Ѓумбирот може да се користи на многу разни начини – за правење на чај, кремасти супи (каде одлично оди во пар со моркови, карфиол, тиква и сл.), како додаток во дресинг за салати, но и како додаток за разни други јадења меѓу кои и слатките.