Рецепт: Парфе торта од костени

Костените се заштитен знак на есенските денови. Неодоливата миризба на печени костени веќе некое време се шири низ улиците и му дава посебна магија на овој период од годината.

Покрај нивната печена и варена варијанта, костените се многу вкусни кога ќе се вклучат и во разни торти и колачи. Овој пат ви нудиме рецепт за лесна парфе торта од костени.

Потребни состојки

Тесто:

- 50 гр. путер;
- 50 гр. шеќер во прав;
- 2 жолчки од јајце;
- 70 гр. чоколадо;
- половина супена лажица горко какао;
- 1 кесичка ванилин шеќер;
- 35 гр. брашно;
- половина лажичка прашок за пециво;
- половина лажичка сол;
- 0,33 дл. слатка павлака (хопла);
- 2 белки од јајце;
- 0,66 дл. млеко.

Фил:

- 500 гр. варени и исчистени костени;
- 400 мл. слатка павлака (хопла);
- 100 гр. шеќер во прав;
- 1 кесичка желатин во прав;
- изматен шлаг;
- рендано чоколадо за декорација.

Подготовка

Најпрво подгответе го тестото, односно чоколадниот бисквит. Пенасто изматете ги путерот и шеќерот, па додавајте ги жолчките, една по една. Потоа, стопете го чоколадото на пареа, оставете го малку да се олади и во него додадете ги какаото и ванилиниот шеќер. Со миксер мешајте сè, додавајќи ги во смесата брашното, прашокот за пециво и солта, а потоа полека и павлаката и млекото. Белките добро изматете ги одвоено, сè додека не добиете цврста пена, а потоа истата додадете ја во смесата и изматете уште малку.

Истурете ја смесата во кружен калап и печете на 180 степени околу 15 минути.

Додека тестото се лади, подгответе го филот. Сварените костени исчистете ги и испасирајте ги. Желатинот подгответе ги според упатството на кесичката. Во костените додадете го шеќерот, а течната слатка павлака измешајте ја со изматената шлаг пена. Измешајте ги костените и шлагот и на крај додадете го растопениот желатин. Измешајте ја смесата со лажица и ставете ја врз испеченото и изладено тесто.

Тортата ставете ја во фрижидер да се олади. Потоа украсете ја со шлаг и попрскајте ја со рендано чоколадо. Добар апетит!