Дали знаете дека конзервираното овошје може да го зголеми ризикот од предвремена смрт? Имено, додека две до три порции сушено и свежо овошје на ден се поврзуваат со намален ризик од смрт од било која причина за 10 проценти, консумацијата на конзервирано и замрзнато овошје го зголемува ризикот за смрт за 17 проценти, заклучуваат научниците.
Тие до овие заклучоци дошле испитувајќи ги податоците за преханбените навики на 65.000 возрасни луѓе во Велика Британија, кои ги следеле седум години, колку што траело истражувањето.
Сепак, не е толку лесно да се разграничи дали ризикот за смрт се зголемува од консумирање на овошје во конзерва или од она што е замрзнато, или пак едноставно тоа се должи на недостатокот на свежи алтернативи.
Познато е дека конзервираното овошје плива во високо фруктозен сируп, а претходните студии го поврзуваат прекумерното ниво на фруктоза со висок крвен притисок, холестерол, вишок на килограми и отпорност на инсулин.
Замрзнатото овошје, од друга страна, по хранливата вредност би требало да се најде на исто скалило со свежото овошје.
- Сè додека не содржи дополнителни шеќери, замрзнатото овошје би требало да биде здраво, или во најмала рака безопасно, тврди д-р Сајмон Кејпвел, професор по клиничка епидемиологија на универзитетот во Ливерпул.