Со малку стар леб, зачини и маслиново масло ќе имате лесен и економичен оброк по сечиј вкус. Можете самите да експериментирате со разни зачини, зеленчук и сувомеснати производи. Ние ви нудиме три лесни начини на кои можете да спремите крцкави брускети.
Основен рецепт
Потребни состојки:
- старо француско лепче (најмногу 2 дена)
- маслиново масло
- неколку ливчиња босилек
- лук
- сол и бибер
Начин на подготовка:
Загрејте ја рерната на 180-200 степени. Исечете го лебот на парчиња со дебелина од 1см. Наредете ги парчињата леб на една тепсија обложена со хартија за печење и печете го околу 10 минути. Додека лебот се пече, вие можете да ги подготвите состојките. Исчистете неколку чешчиња лук со кои ќе ги премачкате препечените парчиња леп. Лукот нема да го сецкате, туку со целите чешчиња ќе поминете на површината на лебот, а потоа ставете малку ситно исечкан босилек. Посолете ги по вкус и на крај прелијте го лепчето со малку маслиново масло.
Брускети со домати
Потребни состојки:
- старо француско лепче (најмногу 2 дена)
- маслиново масло
- неколку ливчиња босилек
- 2 домати
- моцарела
- лук
- сол и бибер
Начин на подготовка:
Додека лебот се пече, исечкајте ги доматите на коцки. Кога брускетите ќе бидат готови, премачкајте ги со лукот, наредете ги доматите заедно со босилекот. Исечете малку свежа моцарела и додајте ја врз парчињата леб, а на крај прелијте со масилново масло и посолете по свој вкус.
Брускети со пршута
Потребни состојки:
- старо француско лепче (најмногу 2 дена)
- маслиново масло
- неколку ливчиња босилек
- пршута
- моцарела
- лук
- сол и бибер
Начин на подготовка:
Откако ќе ги намачкате веќе испечените парчиња леб со лук, на секое парче ставете едно тенко парче пршута. Врз пршутата ставете ситно сечкана моцарела, па на крај капнете неколку капки масло и посолете.
Bon appétit!