Начосот може да се комбинира со сè што ќе посакате, од обична варијанта со кашкавал, до покалорични верзии со мелено месо, павлака и гвакамоле. Овој пат ви презентираме рецепт за начос со ракчиња кој е одлична закуска за вашите домашни забави, но и за вечери поминати пред телевизорот во гледање на некој добар филм.
За ова задоволство ќе ви бидат потребни:
- 1 лажичка маслиново масло
- 1 кесичка чистени ракчиња
- 2-3 лажички кумин (по желба)
- 1 лажичка толчен лук
- 150 грама кисела павлака
- Мал сноп млад кромид
- Кесичка начос чипс
- 250 грама рендан кашкавал
1.Најпрвин го загревате маслото во тавче на умерена температура. Потоа ги додавате ракчињата, куминот и лукот и пржите додека не се добијат убава розова боја.
2.Во следната фаза ги комбинирате ракчињата, киселата павлака и сечканото младо кромитче.
3.Начосот го распоредувате на алуминиумска фолија или пак во поголем плех и врз него ја ставате смесата со ракчиња. На крајот го прекривате целото јадење со ренданиот кашкавал.
4.Го потпекувате на температура од 150 степени околу 5 минути или колку што е потребно да се растопи кашкавалот.