За извонредниот музички талент на Ејми Вајнхаус нема ни потреба да се зборува. Но, знаете ли дека покрај музиката, Ејми се занимаваше и со мода? Нејзината последна колекција ќе биде лансирана за неколку недели.
Британската пејачка која почина на 23-ти јули во Лондон, има дизајнирано неколку колекции облека за модната куќа Fred Perry, кои доживеаја голем успех.
Нејзината прва колекција, инспирирана од 50-тите години, се состоеше од рамно кроени здолништа, ретро фустани и корсети.
Колекцијата за оваа сезона, која е во хавајски стил, Ејми ја претстави во март оваа година. Се состои од 17 модели и тоа капри пантолони, кошули, туники, јакни и тесни здолништа.
Во едно интервју за Harper’s Bazaar пејачката изјавила дека ја подготвила колекцијата есен-зима 2012, повторно за Fred Perry, чии маици и самата често ги носеше.
Од модната куќа соопштија дека новата колекција ќе се појави за неколку недели, а се претпоставува дека интересот за неа ќе биде огромен, каков што е и за моделите од претходните колекции кои станаа многу барани откако почина Вајнхаус. Од пролетната колекција буквално не е останато ниту едно парче, освен можеби по некое на препродажба на eBay, каде можат да се купат дури и влезниците за нејзиниот последен концерт во Белград.