Венецуелката Ивијан Саркос (22) е новата Мис на светот за 2011 година, одлучи синоќа жирито на завршната церемонија во Лондон.
Филипинката Гвендолине Руаис е избрана за прва придружничка, додека официјално најубавата жена на Порторико Аманда Перес ја понесе титулата втора придружничка за оваа година.
На бината во Лондон продефилираа 113 убавици ширум светот. Програмата во живо беше пренесувана во повеќе од 150 држави, а ја следеле, како што се проценува, повеќе од една милијарда гледачи.
Додека во центарот „Ерлс корт“ се избираше новата Мис на светот, околу 50 феминистки пред зградата одржаа протести, носејќи транспаренти на кои пишувало „Да се биде жена не е натпреварување“ и „Сексизмот е многу грд“.
Домаќин на следното натпреварување за Мис на светот ќе биде кинескиот град Ордос.