Гламурот се врати на црвениот тепих, а доказ за тоа се модните креации кои имавме можност да ги видиме на годинешните Златни глобуси.
Доминацијата на светлите нијанси и металик тоновите си го направи своето, па повеќето од А-листата на актерки избраа фустани токму во овие бои.
Бело наспроти црвено совршено функционираше за Кејт Хадсон чиј Versace фустан како да беше залепен за телото, одлично истакнувајќи ја нејзината фигура.
Британската актерка, Роземунд Пајк, направи вистински пресврт, откако само еден месец по породувањето реши да облече креација од Vera Vong која ја открива нејзината половина како и голем дел од деколтето.
Џеј Ло, пак во својот дива стил, направи драматично појавување во парче од колекцијата на Zuhair Murad.
Дами во црвено
Иако велат дека црвената боја можеби не е најдобриот избор за гламурозниот црвен тепих, тоа не ги спречи дамите како Кетрин Зита Џонс, Хајди Клум и Хелен Мирен да заблескаат во црвени фустани од колекциите на Versace и Dolce & Gabbana.
И по некоја модна грешка
Во потрагата по вистинскиот фустан за манифестација од овој калибар, на ѕвездите мошне често им се случува да потпаднат под влијанието на своите стилисти и модните дизајнери, па наместо да го изберат најдоброто, да завршат во креација што не им одговара. Оваа година тоа беше случај со Лана Дел Реј, Амал Клуни како и Кира Најтли.
