Јогата е идеална за справување со стресот и нервозата, па кога можат да ја практикуваат возрасните зошто не би можеле и децата. Доколку го научите своето дете уште од мали нозе да влијае врз својата емотивна состојба преку физички движења, ќе израсне во балансирана и ментално здрава личност.
Се разбира дека тука не станува збор за комплицирани јога пози, туку за едноставни движења кое вашето малечко без проблем ќе ги совлада и ќе бидат корисни за неговото психофизичко здравје.
Пчеличка
Замолете го детето да земе длабок здив. Позата се изведува така што се прави спуштање на колена и рацете се ставаат зад грб. Додека вдишува ја спушта главата надолу и зуи како пчела. Правилното дишење го смирува и му помага во справувањето со емоциите.
Маче
Доколку вашето дете има проблем со стресот и фрустрацијата поставете го во маче поза. Научете го своето дете да го свитка рбетот како мачка. Вовлекувањето на стомакот и напрегањето на грбните мускули благотворно делува на грбот и помага во контролирањето на негативните емоции.
Облак
Позата облак помага во ослободување на скриените трауми кои ги чувствува детето. Вдишувајќи и издишувајќи детето треба да замисли како сите лоши емоции одат нагоре кон облаците.
Дрво
Идејата на позата е детето да научи да ја одржува хармонијата и рамнотежата и во најтешките моменти. Неопходно е да застане право, да го исправи грбот и рамената и да дише длабоко, па потоа едната нога да ја потпре на другата.
Дете
Оваа поза го смирува централниот нервен систем и му дава чувство на сигурност на детето, освен тоа е мошне корисна за хиперактивни деца. Побарајте од вашето дете да клекне на колена и да го собере своето тело држејќи ги рацете до телото. Додека е во оваа поза треба да дише длабоко користејќи го целиот потенцијал на белите дробови.