Калиумот е важен електролит кој им е потребен на клетките за да се извршуваат нормални активности, како мускулни контракции или ефикасно отчукување на срцето. Доколку подолг временски период телото има недостаток од калиум, клетките престануваат да функционираат нормално.
Еве некои знаци кои укажуваат на недостаток на калиум во организмот:
1) Зголемен крвен притисок
Исхраната богата со натриум е поврзана со високиот крвен притисок, но калиумот помага при балансирање на ефектите од натриумот. Колку повеќе калиум внесуваме преку исхраната, толку повеќе натриум се губи преку урината.
Доколку во телото имаме недоволно калиум, како резултат на тоа може да се зголеми крвниот притисок. Калиумот исто така помага при намалување на тензијата во ѕидовите на крвните садови, што дополнително помага за спуштање на притисокот.
2) Нерегуларни отчукувања на срцето
Недостатокот од калиум може да предизвика срцеви палпитации, бидејќи неговото движење во и од срцевите клетки го одржува чукањето на срцето во најдобар ред.
3) Грчеви во мускулите
Бидејќи калиумот е одговорен за мускулните контракции, недостатокот од електролити го продолжува времетраењето на овие контракции што доведува до грчеви во мускулите.
4) Запек
Дигестивните проблеми како запекот може да бидат предизвикани од недостатокот на калиум, а причината за тоа е што тој помага при пренесувањето на сигналите од мозокот до разните делови на телото - како што е дигестивниот систем. Недостатокот од калиум ги ослабува овие сигнали, што резултира со забавување на целиот дигестивен процес.
5) Замор
Разни истражувања покажале дека недостатокот на калиум ја инхибира способноста на телото да создава инсулин, што води до зголемено ниво на шеќер во крвта. Откако нивото на шеќер нагло ќе се зголеми, тоа нагло и паѓа што создава чувство на исцрпеност.