Основно правило е дека не смее да се вози под влијание на алкохол, но колку точно тој останува во системот? Дали би требало да се грижите околу возењето доколку, на пример, сте пиеле претходната ноќ?
Познато е дека алкохолот (во зависност од неговиот вид и количина) може да му наштети на црниот дроб, но многумина не знаат колку многу стрес тој му предизвикува на овој орган по само неколкучасовно пиење.
Главната задача на црниот дроб е да ја филтрира крвта која од дигестивниот тракт се движи до остатокот на телото. Во процесот на обработување на алкохолот кој се консумира, црниот дроб има контакт со токсини кои го замастуваат и предизвикуваат лузни кои потоа можат да го намалат протокот на крв. Тоа пак предизвикува смрт на клетките на црниот дроб, со што се влошува а понекогаш и сопира неговата функција.
Секоја индивидуа го метаболизира алкохолот со различна стапка. Кај повеќето, половина пијачка може да се метаболизира за еден час – во контекст на промили на алкохол во крвта, тоа значи дека ако процентот изнесува 0,8% и повеќе не пиете, за два часа тој би требало да се намали на околу 0,5%.
Колку, пак, му е потребно на телото за комплетно да се ослободи од алкохолот? Тој може во крвта да биде детектиран и до 6 часа по пиењето, околу 12-24 часа во здивот, урината и плунката и до 90 дена во влакната од косата.