Интервалното пешачење – кратки интервали на пешачење со побрзо темпо од вообичаеното, проследени со кратки интервали на пешачење со нормално темпо – може позитивно да влијае на вашето здравје на неколку начини.
1) Помага во слабеењето
Сите вежби кои се изведуваат во вакви интервали, вклучувајќи го и пешачењето, согоруваат повеќе калории за време на активноста и го стимулираат метаболизмот во и по периодот на вежбањето.
2) Помага во контрола на тип 2 дијабетес
Во данска студија било откриено дека оние со тип 2 дијабетес кои редовно изведувале интервално пешачење успеале да го намалат нивото на шеќер во крвта, да го намалат холестеролот и да изгубат на тежина.
3) Го подобрува расположението
Ваквите вежби ги стимулираат невротрансмитерите во мозокот како серотонинот и допаминот, кои го балансираат расположението и ја зголемуваат мотивацијата. Скорешна студија покажала дека 15 минути интензивно вежбање дневно го намалува ризикот од депресија за 26%.
4) Го подобрува кардиоваскуларното здравје
Вежбите кои побаруваат повеќе од 130 чекори во минута имаат поголем ефект врз здравјето на срцето и го подобруваат артериското здравје.
Најдобро е да се почне со пешачење со среден интензитет, за по неколку недели истиот да се зголеми. Кај пациентите со дијабетес или срцеви проблеми, често се започнува со 15 секунди брзо пешачење, па 15 бавно, а како се зголемува кондицијата, така треба да се зголемуваат и интервалите на 30 секунди, па 1 минута, па 2 минути итн.
За време на брзите интервали, треба да пешачите доволно брзо за да ви е тешко да разговарате, што е околу 130-140 чекори во минута. За време на бавните интервали, бројот на чекори во минута треба да изнесува 100-110 .