Повеќето експерти се сложуваат дека при слабеењето, безбедната тежина која треба да се намали во текот на една недела изнесува максимум помеѓу половина и еден килограм.
Сепак, која тежина е здрава и реална да се намали за еден месец?
Кога прв пат се започнува со режим на исхрана наменет за слабеење, најчесто се слабее повеќе од препорачаните 0,5 – 1кг. неделно, но таа тежина скоро никогаш не се истопени масти, туку се работи за ослободување од вишокот вода во организмот.
Причината за тоа е намалувањето на внесот на натриум и исфрлање на процесираната храна од исхраната која содржи и додадени шеќери.
Некои од пациентите на нутриционистичктие експерти губат и до 2-5кг. во првата недела од диетата со намален внес на јаглехидрати и калории, а тој процес подоцна се забавува.
Резултатите секогаш се подобруваат доколку на новиот режим на (здрава) исхрана се додаде и вежбањето, кое го забрзува слабеењето.
Експертите напоменуваат дека секој пат кон посакуваното намалување на тежината е исполнето со платоа и тоа е сосема нормално.
Тие препорачуваат и фокусирање на „победите“ кои не се поврзани со помал број на вагата, како што е повторно „влегување“ во облека која ни била претесна (постигнато со намалување на обемот), кревање на поголема тежина во теретана и сл., со цел да се одржи мотивацијата за време на едно вакво плато, т.е стагнирање во процесот на слабеењето.
Стагнацијата се случува најчесто кога на телото му е потребна некаква промена. Како што тоа се навикнува на помал внес на храна, метаболизмот се прилагодува за да функционира поефикасно – што значи дека телото ќе врши одредени функции со помалку трошење на енергија, согорувајќи помалку калории отколку претходно.
За тоа да се промени, потребно е да се додаде некоја активност на која телото не е навикнато (нова вежба или менување на интензитетот или тежината на постоечкото тренинг, и сл.), а не и дополнително да се ограничи внесот на калории, бидејќи тоа може да има спротивен ефект – телото да навлезе во фаза на гладување и сè што ќе се внесе во него да го складира во масти.
Во поглед на тоа колку килограми е пожелно да се изгубат месечно, не постои финална, „магична“ бројка, бидејќи таа зависи од личност до личност. Исто така, доколку истовремено и се вежба, таа бројка може и да не се менува и покрај тоа што мастите се топат, бидејќи мускулното ткиво е потешко од мастите.
Она што е важно е процесот да не се форсира и да е во рамките на препорачаното, а слабеењето да е одржливо подолг временски период, со цел да се избегне т.н јо-јо ефект кој се јавува кога слабеењето е пребрзо и кога изгубените килограми повторно се враќаат, плус со дополнителна тежина.