Неодамна објавената студија во списанието Sleep, тврди дека заради недостаток на сон очите стануваат црвени и натечени, а капаците сè повеќе се спуштаат и со текот на времето се создаваат повеќе брчки.
Во меѓувреме, други студии покажуваат дека изгледаме поубаво и поенергично доколку отспиеме осум часа, во споредба со оние кои спијат помалку.
После непроспиена ноќ, многумина ги мачат и црните кругови околу очите. Експертите од универзитетот Рочестер, за Huffington Post објаснуваат дека тоа е поврзано со насобирање на течност во тие предели, а бидејќи кожата околу очите е најтенка, секоја промена многу лесно се забележува.
Заради тоа, веднаш ќе се види промена на кожата, било да е предизвикана од дехидрација или, пак, од консумација на многу солена храна, па утрото може да се разбудите со омразените подочници.
Покрај ненаспаност или лош начин на исхрана, на вашата состојба на лицето влијае и начинот на кој сте ја поминале ноќта. После вечерно излегување, алкохол и непроспиена ноќ, сигурно ќе изгледате многу полошо отколку само да сте гледале телевизија до доцните часови. Доколку патите од проблем од овој вид, не ви преостанува ништо друго туку да се придржувате до здравиот начин на живот и редовно да спиете по осум часа.