Берлин, 4 јули 2015 (МИА) - Грчкиот министер за финансии Јанис Варуфакис изјави дека во понедленик очекува спогодба со меѓународните кредитори на Грција независно од исходот на утрешниот референдум во земјата, пренесоа британските медиуми.
Варуфакис ова го изјави во интервју за германскиот весник „Франкфуртер алгемајне цајтунг“.
-Очекувам во понедлник да имаме спогодба. И тоа ќе се случи независно дали мнозинството на референдумот ќе каже „да“ или „не“, посочи министерот за финансии во интервјуто, од кое извадоци беа објавени денеска.
„Не ги слушајте оние кои кажуваат дека предлозите веќе не се на маса - се разбира дека уште се таму, затоа што тоа е она што тие го сакаат“, додаде Варуфакис за германскиот весник.
Грчкиот министер за финанси го искористи интервјуто за жесток напад врз својот германски колега Волфганг Шојбле, познат по својата цврста позиција кон Грција.
-Господинот Шојбле уште во 2012 година јасно покажа дека повеќе претпочита Грекзит, го цитира „Франкфуртер алгемајне цајтунг“ првиот грчки финансиер.