Меркел ја повика Турција да не го прекинува мировниот процес со Курдите

Берлин, 26 јули 2015 (МИА) - Германија ќе ја поддржи Анкара во борбата против екстремистите, изјави германскиот канцелар Ангела Меркел во телефонскиот разговор со турскиот премиер Ахмет Давутоглу.

Меркел во исто време ја повика Анкара да одговори пропорционално на заканите. 

Телефонскиот разговор беше спроведен откако курдски борци убија двајца турски војници, јавно одмаздувајќи се за операцијата на Анкара против ПКК, која беше спроведена заедно со нападите врз бунтовниците од ИД во Сирија.

Давутоглу ја информирал Меркел за дејствијата на турската Влада во борбата против тероризмот по нападот во Суруч и други напади врз турските сили за безбедност, изјави портпарол на германската влада. 

Меркел го уверила Давутоглу за солидарноста и поддршката на Германија, рече портпаролот но во исто време додаде: „Во тој контекст таа потсети на принципот на пропорционалност при примена на неопходните мерки“.

Меркел повика и да нема откажување од мировниот процес со Курдите, независно од сите тешкотии, додаде портпаролот.